Tagraidhean Fosgailte – Duaisean nan Sgrìobhadairean Ùra 2027

Air fhoillseachadh: 22 Cèitean 2026 ann an Naidheachdan

Tha Duaisean nan Sgrìobhadairean Ùra 2027 a-nis fosgailte do thagraidhean.

Ceann-latha: 12f, Diciadain 29 Iuchair 2026. 

Tha e an-asgaidh cur a-steach airson nan duaisean agus gheibhte cosgaisean siubhail gu lèir air ais. Thèid an luchd-buannachaidh a thaghadh le pannal de bhritheamhan. Is mathaid gum faodadh taic a bharrachd a bhith ann do luchd-buannachaidh air a bheil bacaidhean a thaobh a bhith a’ gabhail pàirt. Tha am prògram sùbailte agus bidh sinn ag obair gu dlùth leis an luchd-buannachaidh gus am faigh iad taic iomchaidh.

Bidh na Duaisean a’ ruith eadar Am Faoilleach 2027 agus Am Faoilleach 2028. Rè a’ phrògraim gheibh an luchd-buannachaidh:

• duais luach £2,500, gus am faigh iad cothrom aire a chumail air an obair (thèid am bursaraidh a phàigheadh ann an dà chuibhreann)
• cothroman leasachaidh pearsanta, air an sònrachadh airson gach neach, mar mheantaireachd bho sgrìobhadairean no proifeiseantaich sa ghnìomhachas
• trèanadh ann am PR agus a bhith a’ taisbeanadh an cuid obrach
• cothrom an obair aca a thaisbeanadh do dh’fhoillsichearan agus luchd-riochdachaidh
• seachdain aig ionad-sgrìobhaidh, far am faigh iad ùine, farsaingeachd agus saorsa airson obair ùr a chruthachadh ann an àrainneachd àlainn (a rèir na tha ceadaichte san t-suidheachadh).
• àite an-asgaidh air cùrsa 3-latha airson sgilean deasachaidh Gàidhlig
• ballrachd an-asgaidh fad bliadhna aig Comann nan Sgrìobhadairean agus seisean trèanaidh leis a’ chomann

Gabhaidh am meantaireachd, trèanadh agus taisbeanaidhean air fad a dhèanamh aig astar ma tha feum air an roghainn seo. Tha sinn toilichte bruidhinn ri daoine fa-leth mu na feumalachdan aca air goireasan sònraichte mus cuir iad tagradh a-steach.

Tha dà dhuais ann airson sgrìobhadairean Gàidhlig, gan ruith mar cho-bhanntachd eadar Urras Leabhraichean na h-Alba agus Comhairle nan Leabhraichean.

Tha sinn a’ cur fàilte air iarrtasan bho luchd-cùraim, feadhainn a tha gun obair no feadhainn nach eil ag obair air adhbharan slàinte.

Lorgar fiosrachadh air ciamar a chuirear a-steach tagradh air làrach-lìn Comhairle nan Leabhraichean an seo.

Ceistean sam bith? Cuiribh post-d gu [email protected].

Rannan Chloinne

Air fhoillseachadh: 3 Màrt 2026 ann an Naidheachdan

Nuair a bha Comhairle nan Leabhraichean agus Leabharlann na Bàrdachd a’ lorg pròiseact a dhèanadh iad còmhla ann an 2025-26, bha e follaiseach gum bu chòir dhuinn prìomhachas a thoirt do dhàin ùra do chloinn. Seo gnè-litreachais far a bheil cruaidh-fheum air leasachadh, agus tha sinn an dòchas gum bi na dàin ùra a chaidh a sgrìobhadh airson Rannan Chloinne a’ toirt tlachd do na leughadairean òga agus brosnachadh do na bàird fhèin, agus gum faic sinn barrachd sna bliadhnaichean a tha romhainn mar thoradh air an iomairt seo. Gheibhear measgachadh de chuspairean agus faireachdainnean am measg nan rannan seo – rudan aotrom, rudan nas truime, rudan a bheir togail don spiorad agus rudan a dhùisgeas smuain, agus a h-uile rud sin ann an Gàidhlig ghrinn. Tha sinn fada an comain Phàdraig MhicAoidh, Makar na h-Alba, airson a chomhairle agus obair mar neach-deasachaidh.

Seo agaibh na dàin a tha mar thoradh air a’ phròiseact:

An Fhallaid, le Meg Bateman

An Taghan ‘s an Geamair, le Aonghas MacLeòid

Aoibheag ò an iomain, le Eòghann Stiùbhart

Bualadh Boise, le Niall O’Gallagher

Cha Toigh Leamsa Sgrìobhadh, le Màrtainn Mac an t-Saoir

Lilidh, le Anna Frater

Meaban, le Iain MacRàth

Na Raiders, le Robbie Anndra MacLeòid

Nuair a thàinig a’ Phiseag, le Joan Nicdhòmhnaill

Preasa Mo Sheanar, le Mòrag Anna NicNèill

Rannan-Chloinne, le Rody Gorman

Rudan fiadhaich, le Beth Frieden

Sleepover na h-Alba, le Marcas Mac an Tuairneir

Tadhailaibh air làrach-lìn Leabharlann na Bàrdachd airson tuilleadh fiosrachaidh mu Rannan Chloinne.

Na Duaisean Litreachais 2026 – Fosgailte do thagraidhean

Air fhoillseachadh: 2 Màrt 2026 ann an Naidheachdan

Tha Comhairle nan Leabhraichean air ainmeachadh gu bheil Na Duaisean Litreachais 2026 fosgailte airson thagraidhean bho sgrìobhadairean agus foillsichearan Gàidhlig. Bidh duaisean luach £750 dhan ùghdar is £750 dhan fhoillsichear rim faighinn airson leabhraichean a chaidh fhoillseachadh eadar 1 Cèitean 2025 agus 30 Giblean 2026 ann an diofar gnèithean litreachais:

• Bàrdachd – Duais Ruaraidh MhicThòmais
• Ficsean – Duais Chomann Gàidhealach Lunnainn
• Neo-fhicsean – Duais Dhòmhnaill Meek
• Clann aois 0-7
• Clann aois 8+

Am-bliadhna bidh dà fharpais fa-leth ann airson leabhraichean cloinne, a’ dèanamh sgaradh eadar leabhraichean do phàistean aois 0-7, agus clann aois 8 is nas sinne. Aig Duaisean roimhe cha robh ann ach aona dhuais airson nan leabhraichean cloinne agus òigridh air fad.

A bharrachd air leabhraichean a tha ann an clò mar-thà, faodaidh sgrìobhadairean làmh-sgrìobhainnean neo-fhoillsichte do chloinn is do dh’inbhich a chur a-steach dhan fharpais, le duaisean eadar £500 agus £1,000 dhan luchd-buannachaidh. A thuilleadh air an duais, bidh cothrom aig ùghdar na làmh-sgrìobhainn as fheàrr do chloinn an leabhar aca a leasachadh ann an co-bhann leis an fhoillsichear Acair.

Is e  5.00f, Dihaoine 01 Cèitean 2026 an ceann-latha airson thagraidhean. Gheibhear fios mu ciamar a chuirear a-steach agus riaghailtean na farpaise an seo. Thèid an luchd-buannachaidh ainmeachadh aig cuirm ann an Cottiers Theatre, Glaschu air Dimàirt 15 Sultain 2026.

Faclan gan trusadh airson Bàrd a’ Chomuinn

Air fhoillseachadh: 23 Gearran 2026 ann an Naidheachdan

Tha Comhairle nan Leabhraichean a’ faighneachd air daoine na faclan Gàidhlig neo-àbhaisteach aca a chur thuca.

Air Seachdain na Gàidhlig bidh Comhairle nan Leabhraichean a’ trusadh faclan Gàidhlig bhon phobaill nach eileas a cleachdadh gu làitheil tuilleadh airson pròiseact còmhla ri Anna Frater, Bàrd a’ Chomuinn. Bidh Anna Frater a’ cleachdadh nam faclan neo-chumanta seo airson dàn ùr a sgrìobhadh, airson ’s gun tèid brìgh is ciall nam faclan a ghlèidheadh.

Ma tha faclan no abairtean Gàidhlig agad nach eil gan cleachdadh gu tric tuilleadh, innis dhuinn mun dèidhinn!

Faodaidh sibh fios a chur thugainn air post-d aig [email protected], no sgrìobhadh thugainn air Instagram agus Facebook.

’S e Latha Abairt na Gàidhlig a bhios ann an Diardaoin 26mh dhen Ghearran, mar sin cleachd #lathaabairtnagàidhlig airson am facal agad a sgaoileadh fad’ is farsaing.

Thèid an dàn ùr fhoillseachadh aig tachartas sònraichte ann an Steòrnabhagh ann an 2026.

Farpais chloinne: Cù Giobach

Air fhoillseachadh: 9 Gearran 2026 ann an Naidheachdan

Airson Seachdain na Gàidhlig agus latha foillseachaidh Cù Giobach a chomharrachadh, tha Belle Kids, ann an co-bhann le Comhairle nan Leabhraichean, a’ toirt chothrom do chloinn leth-bhreac dhen leabhar agus àirleas National Book Token luach £25 a bhuannachadh!

’S e leabhar cloinne Gàidhlig le caibideilean a th’ ann an Cù Giobach, stèidhichte air aon dhe na leabhraichean cloinne as soirbheachaile riamh. Tha e ag innse sgeulachd mu chù trèigte a tha làn dheargannan is e a’ fuireach air an t-sràid. Tha a’ chridhe làn choibhneis, is chan eil e ag iarraidh ach dachaigh is maighstir còir, ach bidh sin uaireannan ga chur ann an suidheachaidhean cunnartach.

Tha dà roinn ann – faic an dealbh gu h-ìosal airson bheachdan

• Duais airson a bhith a’ tarraing an deilbh as fheàrr ceangailte ris an leabhar
• Duais airson na sgeulachd Ghàidhlig as fheàrr mu chù (suas ri 50 facal)

Riaghailtean

• Aon thagradh an urra airson gach roinn dhen fharpais.
• Chan fhaodar goireasan Tuigse Innealta (AI) a chleachdadh.
• Feumaidh tagraichean a bhith 12 no nas òige aig àm an tagraidh.
• Cuir tagraidhean ann an cruth Word ceangailte ri post-d gu [email protected].
• Feumaidh ainm is aois an tagraiche a bhith anns a’ phost-d a-mhàin.
• Na cuir ach an sgeulachd no dealbh am broinn an Word doc.
• Thèid tagraidhean a mheasadh gun urra.
• Tha co-dhùnadh nam britheamhan deireannach agus cha bhi còmhradh ann mu dheidhinn.
• Ceann-latha: 5f, Dihaoine 27 Gearran 2026.
• Cha tèid tagraidhean a thilleadh.
• Tha Belle Media & CNL ag aontachadh nach tèid am fiosrachadh a chleachdadh ach airson na farpais.
• Dh’fhaodadh gun tèid na tagraidhean a bhuannaicheas fhoillseachadh ann an Cuairt-litir Chomhairle nan Leabhraichean.
• Le bhith a’ cur a-steach dhan fharpais, tha tagraichean ag aontachadh ris an fhoillseachadh gu h-àrd

Fosgailte do thagraidhean: Duais Bhàrdachd Baile na h-Ùige

Air fhoillseachadh: 2 Gearran 2026 ann an Naidheachdan

Chaidh Duais Bhàrdachd Baile na h-Ùige a chur air bhog airson an 21mh bliadhna – le pannal de bhritheamhan a tha a’ lasadh bàrdachd is litreachas na h-Alba.

Bidh na duaisean Ghàidhlig is Albais a’ tàladh thagraidhean bho iomadh ceàrn dhen t-saoghail – cuid bho Albannaich a tha a’ fuireach thall thairis, cuid bho dhaoine aig a bheil ceanglaichean làidir gu Alba agus cuid eile bho feadhainn aig a bheil meas is ùidh anns an dùthaich.

Duaisean 2026

• Wigtown International Prize: Prìomh dhuais: £1,500. Dàrna àite: £200
• Wigtown Scots Prize: Prìomh dhuais: £500. Dàrna àite: £200
• Wigtown Scottish Gaelic Prize: Prìomh dhuais: £500. Dàrna àite: £200. Taic bho Chomhairle nan Leabhraichean
• Dumfries & Galloway Fresh Voice Award: Taic phroifeiseanta leithid meantorachd le Wigtown Festival Company agus seachdain sgrìobhaidh aig Ionad Sgrìobhadh Cruthachail na h-Alba, Moniack Mhor. Taic bho Moniack Mhor
• Alastair Reid Pamphlet Prize: Foillseachadh an leabhrain le Gerry Cambridge

Tha an duais Ghàidhlig na taisbeanadh air cuid den nuadh-bhàrdachd Ghàidhlig as fheàrr agus i a’ nochdadh beartas sgrìobhaidh Gàidhlig.

Bidh cothrom thagraidh a’ dùnadh aig meadhan-là (12f) air Diciadain 6 Cèitean 2026.

Seo britheamhan farpaisean na bliadhna-sa:

• Ruth Padel – Wigtown International Prize
• Niall O’Gallagher – Wigtown Scottish Gaelic Prize
• Rab Wilson – Wigtown Scots Prize
• Ruth Padel – Alastair Reid Pamphlet Prize
• Marjorie Lotfi – Dumfries and Galloway Fresh Voice Award.

Thuirt Niall O’Gallagher, “Tha duais bhiladhnail Bhaile na h-Ùige na cothrom cluas a chur ris na tha tachairt ann am bàrdachd Ghàidhlig na h-Alba. Is mi a tha dèanamh fiughair ri fios bho bhàird an latha an-diugh feuch càite a bheil an aire agus ciamar a chuireas iad saoibhreas a’ chànain gu feum.”

Thuirt Alison Lang, Stiùiriche Comhairle nan Leabhraichean, “Tha Comhairle nan Leabhraichean toilichte a bhith a’ cumail taic ri Farpais Bhàrdachd Baile na h-Ùige a-rithist, agus tha sinn an dòchas gum bi sgrìobhadairean Gàidhlig air am brosnachadh gus dàin ùra a chur a-steach. Tha e daonnan na thlachd a bhith ag aithneachadh tàlant nam bàrd tron fharpais seo, agus bidh e na urram dhuinn soirbheas an luchd-buannachaidh a chomharrachadh as t-fhoghar 2026.”

Tuilleadh fiosrachaidh: www.wigtownpoetryprize.com  

Cùrsa Inntrigidh 21/02/26 – Gràmar & Cleachdadh Cànain

Air fhoillseachadh: 9 Faoilleach 2026 ann an Naidheachdan

Disathairne 21 Gearran 2026, Dùn Èideann

Augustine United Church, 41 George IV Bridge, Dùn Èideann, EH1 1EL
Cùrsa aon latha: 9.30m-5.00f
Còmhla ri Michel Byrne

CÒ DHA?

’S ann do dh’inbhich aig a bheil beagan eòlas air Gàidhlig sgrìobhte a tha an cùrsa – feadhainn a tha aig ìre A2 no nas àirde a rèir Ìrean Cànain Coitcheann na h-Eòrpa, agus aig a bheil ùidh ann a bhith a’ sgrìobhadh, neo a tha an sàs anns na meadhanan neo foghlam.

COSGAIS?

Cuiribh fios gu [email protected]

CIA MHEUD ÀITE?

Mar as trice gheibh suas ri deichnear (10) cothrom a dhol air a’ chùrsa seo.

CÒ NÌ OIDEACHAS?

Michel Byrne (eòlaiche-cànain) a th’ air a bhith a’ teagasg grunn bhliadhnachan, agus a tha air leabhraichean gràmair a sgrìobhadh. Tha e ag obair aig Oilthigh Ghlaschu.

BUANNACHD?

Bheir an cùrsa seachad taic fheumail airson sgilean gràmair agus cleachdadh cànain a leasachadh. Fhreagradh seo ort ma tha ceistean agad co-cheangailte ris na gnothaichean seo.

CIAMAR A GHEIBH MI COTHROM?

Airson tuilleadh fiosrachaidh neo airson iarrtas a chur a-steach, cuiribh fios gu [email protected] ro Dihaoine, 13mh dhen Ghearran, 2026.

CEANN LATHA TAGRAIDH

13th February 2026. Airson àite a ghleidheadh, cuiribh fios gu [email protected]

Cùrsa Ùrachaidh 24/01/26 – Gràmar & Cleachdadh Cànain

Air fhoillseachadh: 9 Faoilleach 2026 ann an Naidheachdan

Disathairne 24 Faoilleach 2026, Glaschu

Impact Arts, The Boardwalk, 105 Sràid Brunswick, Glaschu, G1 1TF.
Cùrsa aon latha: 9.30am-5pm
Còmhla ri Michel Byrne

CÒ DHA?

’S ann do dh’inbhich aig a bheil eòlas air Gàidhlig sgrìobhte agus gràmar a tha an cùrsa – feadhainn a tha aig ìre B2 no nas àirde a rèir Ìrean Cànain Coitcheann na h-Eòrpa, agus a tha air rudeigin a sgrìobhadh mar-thà, neo a tha an sàs anns na meadhanan neo foghlam. Thèid an cùrsa a theagasg tro mheadhan na Gàidhlig.

COSGAIS?

Cuiribh fios gu [email protected]

CIA MHEUD ÀITE?

Mar as trice gheibh suas ri deichnear (10) cothrom a dhol air a’ chùrsa seo.

CÒ NÌ OIDEACHAS?

Michel Byrne (eòlaiche-cànain) a th’ air a bhith a’ teagasg grunn bhliadhnachan, agus a tha air leabhraichean gràmair a sgrìobhadh. Tha e ag obair aig Oilthigh Ghlaschu.

BUANNACHD?

Fhreagradh seo ort ma tha ceistean agad a thaobh sgrìobhadh ann an Gàidhlig. Bheir an cùrsa seachad taic fheumail airson sgilean gràmair agus cleachdadh cànain a leasachadh.

CIAMAR A GHEIBH MI COTHROM?

Airson tuilleadh fiosrachaidh neo airson iarrtas a chur a-steach, cuiribh fios gu
[email protected] ro Dihaoine, 16mh dhen Fhaoilleach, 2026.

GEÀRR-AITHRIS ANN AM BEURLA

Intermediate-advanced level Gaelic writing skills course at Impact Arts, 105 Brunswick Street, Glasgow on Saturday 24th January 2026, aimed at Gaelic authors and those using written Gaelic in the media and education. The medium of instruction is Gaelic: this is a course for fluent speakers. The tutor is Michel Byrne. Limited places. One-day course – 9:30am-5pm.

Organised by the Gaelic Books Council.

CLOSING DATE FOR APPLICATIONS

16th January 2026. Airson àite a ghleidheadh, cuiribh fios gu [email protected]

Litir Gu Glaschu 2025: Luchd-buannachaidh

Air fhoillseachadh: 20 Samhain 2025 ann an Naidheachdan

Chaidh an sgrìobhadair, òranaiche agus sgoilear Robbie MacLeòid ainmeachadh mar bhuannaiche farpais sgrìobhaidh nan inbheach Litir Gu Glaschu (Letter to Glasgow), farpais bhliadhnail chliùiteach air a chur air bhonn le Comhairle nan Leabhraichean agus Glaschu Beò, an carthannas a tha os cionn cultar, tachartasan agus beatha èasgaidh ann an Glaschu.

Gach bliadhna bidh an fharpais phoblach a’ brosnachadh luchd-sgrìobhaidh na Gàidhlig de gach aois gu bhith a’ sgrìobhadh litir chun bhaile as motha ann an Alba air cuspair sònraichte. Sa bhliadhna 2025 – nuair a bha Glaschu a’ comharrachadh 850 bliadhna na baile – chaidh iarraidh air tagraichean litir a’ sgrìobhadh a’ buntainn ri eun, craobh, clag agus iasg: suaicheantasan traidiseanta a’ bhaile.

Chruthaich MacLeòid litir eirmseach, smaoineachail a tha na riochd de litir a chaidh a sgrìobhadh 850 bliadhna air thoiseach san àm ri teachd, a chaidh a chur air falbh bho chabhlaich fànais Albannaich, a’ caoidh lèir-sgrios na h-àrainneachd bho na thàr iad às beò. Rinn na britheamhan luaidh air an litir mar

“ath-mhìneachadh cumhachdach de shuaicheantasan Ghlaschu mar rabhadh mun chunnart àrainneachd a tha romhainn an-dràsta, a’ cruthachadh ìomhaigh, chan ann a-mhàin de dh’eachdraidh a’ bhaile, ach na dh’fhaodadh a bhith an dàn dhi.”

Thèid an litir aige fhoillseachadh ann an iris STEALL, a’ cur ris an obair sgrìobhte eile aig MacLeòid a chaidh fhoillseachadh le Gutter, New Writing Scotland agus 404 Ink, agus tha e a’ cosnadh duais £500.

Chaidh farpais an òigridh a bhuannachadh le Ayla Weller (C6) bho Bhun-sgoil Ghleann Dail. Chòrd an litir aice, a bha a’ brosnachadh muinntir Ghlaschu gu bhith a’ glanadh pàircean is slighean uisge a’ bhaile, ris na britheamhan, a’ dèanamh coimeas eadar luach raointean uaine a’ bhaile agus an cunnart bho sgudal is truailleadh. Bhuannaich Ayla àirleas leabhair agus tiocaid teaghlaich gu cuirm aig Celtic Connections.

Seo an litir aig Ayle Weller:

’S toil leam a’ bhith a’ fuireach ann an Glaschu air sgàths gu bheil tòrr pàircean ann agus beathaichean cho snog ACH tha fhathast rudan dona ann. Feumaidh sinn barrachd craobhan anns na pàircean airson na feòragan. Feumaidh sinn barrachd cluicheadairean anns an Hydro.

A h-uile latha bidh mi a’ dol dhan uisge a’ coimhead air na h-èisg ACH an-diugh bha mar 100,000 pìosan de sgudal. Aon latha chaidh mi dhan sgoil agus chaidh an clag agus bha e mar a sheinn Taylor Swift aig cuirim-ciùil.

’S toil leam a’ bhith a’ coimhead air na faoileagan a’ tighinn bho na h-ealainean brèagha ACH bidh iad a’ cacadh air mo cheann. Feumaidh sinn barrachd bionaichean agus buidhnean-sgudal. ’S dòcha gum bi na h-ainmean ‘sgudalputals’ neo ‘chan eil sgudal math’ gu math? O, tha fios agam ‘Buidhean Sgudal Ghlaschu’. Chan fheum sinn bruidhinn mu dheidhinn sin an-dràsta.

Tha na pàircean cho brèagha ann an Glasachu. ’S toil leam a’ bhith a’ dol gu Pàirce na Banrighe leis a’ chù agam ACH chan eil tòrr àiteachan-chluich math anns na pàircean. Feumaidh sinn barrachd bùithtean mar Lidl, Aldi agus Sainsbury’s airson biadh blasta fhaighinn cuideachd. B’ e iad sin na rudan a tha mi ag iarraidh ann an Glasachu agus na rudan a tha math ann.

Tìoradh an-dràsta,
Bho rapper ann an Glaschu

Chaidh Litir gu Glaschu a steidheachadh ann an 2019 airson sgrìobhadh na Gàidhlig a bhrosnachadh sa bhaile. A’ tabhann aon de na duaisean airgid as motha airson farpais sgrìobhaidh chruthachail ann an Alba, chaidh na tagraichean an taghadh le panail air a dhèanamh an àirde de Mhakar na h-Alba, Pàdraig MacAoidh, agus luchd-obrach bho Glaschu Beò agus Comhairle nan Leabhraichean. Tha Bòrd na Gàidhlig a’ cur taic ri Litir gu Glaschu.

CÙRSA 04/12/2025 – GRÀMAR & CLEACHDADH CÀNAIN SGILEAN SGRÌOBHAIDH

Air fhoillseachadh: 23 Dàmhair 2025 ann an Naidheachdan

Diardaoin 04 an Dùbhlachd 2025, Glaschu

Piping Centre (Ionad Nàiseanta na Pìobaireachd) 30-34 Sràid McPhater, Glaschu, G4 0HW.
Cùrsa aon latha: 9.30am-5pm
Còmhla ri Michel Byrne

CÒ DHA?

‘S ann do dh’inbhich aig a bheil beagan eòlais air Gàidhlig sgrìobhte agus gràmar a tha an cùrsa – feadhainn a th’ air rudeigin a sgrìobhadh mar-thà, neo a tha an sàs anns na meadhanan neo foghlam.

COSGAIS?

Cuiribh fios gu [email protected]

CIA MHEUD ÀITE?

Mar as trice gheibh suas ri deichnear (10) cothrom a dhol air a’ chùrsa seo.

CÒ NÌ OIDEACHAS?

Michel Byrne (eòlaiche-cànain) a th’ air a bhith a’ teagasg grunn bhliadhnachan, agus a tha air leabhraichean gràmair a sgrìobhadh. Tha e ag obair aig Oilthigh Ghlaschu.

BUANNACHD?

Fhreagradh seo ort ma tha ceistean agad a thaobh sgrìobhadh ann an Gàidhlig. Bheir an
cùrsa seachad taic fheumail airson sgilean gràmair agus cleachdadh cànain a leasachadh.

CIAMAR A GHEIBH MI COTHROM?

Airson tuilleadh fiosrachaidh neo airson iarrtas a chur a-steach, cuiribh fios gu
[email protected] ro Dihaoine, 14mh dhen t-Samhain, 2025.

GEÀRR-AITHRIS ANN AM BEURLA

Intermediate-advanced level Gaelic writing skills course at the National Piping Centre in Glasgow on Thursday, 4th of December 2025, aimed at Gaelic authors and those using written Gaelic in the media and education. The medium of instruction is Gaelic: this is a course for fluent speakers. The tutor is Michel Byrne. Limited places. One-day course – 9:30am-5pm.

Organised by the Gaelic Books Council.

CLOSING DATE FOR APPLICATIONS

14th November 2025. To apply, cuiribh fios gu [email protected]